تفتان میں محصور زائرین کی داد رسی کیلئے تحریک نفاذ فقہ جعفریہ کے ارباب اقتدار کو مراسلے

وزیراعظم اور وزیر داخلہ زائرین کی داد رسی کے لیے فوری نوٹس لیں۔ ٹی این ایف جے
پاک ایران بارڈر تفتان زائرین کیمپ میں محصور اہلِ وطن بحفاظت گھروں کو واپسی کیلئے بے یارو مددگار حکومتی اقدام کے منتظر ہیں
کئی کئی ہفتوں سے انتظار میں موسمی سختیوں اور خوراک ودواوں کی کمی کے بیماریوں میں مبتلا ہو رہے ہیں، خوشاب کے زائر منظور حسین تفتان کیمپ میں انتقال کرگئے،
تفتان کیمپ میں محصور زائرین کی گھروں کو واپسی میں تاخیر پرسیکرٹری جنرل ٹی این ایف جے علامہ بشارت حسین امامی کا صدر، وزیراعظم اور وزیر داخلہ کے نام مراسلہ

اسلام آباد ( ولایت نیوز) پاک ایران بارڈر تفتان زائرین کیمپ میں محصور اہلِ وطن بحفاظت گھروں کو واپسی کے لیے بے یارو مددگار حکومتی اقدام کے منتظر ہیں، تفتان تا کوئٹہ مسافت دہشت گردوں کا آسان ہدف رہا ہے، زائرین کے قافلے سیکورٹی حصار میں فی الفور روانہ کیے جائیں، ماہ مبارک رمضان المبارک میں زائرین کی گھروں کی واپسی میں تاخیر سے بے چینی میں اضافہ، گذشتہ20 دنوں سے کوئی قافلہ روانہ نہیں کیا جاسکا زائرین کے عزیز واقارب میں اضطراب کی لہر، بزرگ اور بیمار زائرین طویل انتظار اور موسمی حالات کے باعث فوت ہورہے ہیں انتظامیہ ٹس سے مس نہیں ہو رہی، خوشاب کے زائر منظور حسین تفتان کیمپ میں جاں بحق، وزیراعظم اور وزیر داخلہ زائرین کی داد رسی کے لیے فوری نوٹس لیں۔ تفتان کیمپ میں محصور زائرین کی گھروں کو واپسی میں تاخیر پر سیکریٹری جنرل تحریک نفاذ فقہ جعفریہ علامہ بشارت حسین امامی کا صدر، وزیراعظم اور وزیر داخلہ کے نام مراسلہ، علامہ امامی نے مراسلہ میں لکھا کہ زائرین میں بوڑھے اور بیمار افراد کے ساتھ ساتھ بڑی تعداد میں خواتین مستورات بھی ہیں جو فوری طور پر گھروں کی واپسی کی منتظر ہیں۔ انہوں نے کہا کہ زائرین جو پہلے ہی سفر کی صعوبتیں جھیل کر وطن کی سرحد میں داخل ہونے پر گھروں کو جلد واپسی کی امید لگائے بیٹھے تھے، کئی کئی ہفتوں سے انتظار میں موسمی سختیوں اور خوراک ودواوں کی کمی کے بیماریوں میں مبتلا ہو رہے ہیں، علامہ بشارت حسین امامی نے اپنے مراسلے میں لکھا کہ چند ماہ قبل شام میں عسکریت پسندوں کی جانب سے حکومت پر قبضہ کے بعد ہزاروں پاکستانی زائرین کو حکومت پاکستان کے بروقت اقدام سے زائرین المیہ سے محفوظ رہے اور تحریک نفاذ فقہ جعفریہ پاکستان کے سربراہ علامہ آغا سید حسین مقدسی نے وزیراعظم، وزیراعظم داخلہ اور وزیر خارجہ کا بطور خاص شکریہ ادا کیا تھا لہذا تفتان میں منتظر زائرین کی گھروں کو واپسی فوری یقینی بنائی جائے۔ مراسلہ میں سیکریٹری جنرل تحریک نفاذ فقہ جعفریہ علامہ بشارت حسین امامی نے اس اُمید کا اظہار کیا کہ اربابِ اختیار اس انتہائی اہم مسلہ کی جانب توجہ مبذول کریں گے اور کسی بھی انسانی المیہ سے قبل ہی دادرسی کی سبیل کر کے زائرین کو لاوارث ہونے کے احساس سے بچاییں گے