موسم عزا کا آغاز؛ کربلائے معلیٰ میں باقاعدہ تقریب کے بغیر سرخ عَلَم سیاہ عَلَموں سے تبدیل کردیئے گئے

ولایت نیوز شیئر کریں

کربلائے معلی (ولایت نیوز مانیٹرنگ ڈیسک۔ بشکریہ الکفیل ) محرم کے چاند کا اعلان ہوتے ہی موسم عزا کے آغاز پر روضہ مبارک امام حسین علیہ السلام اور روضہ مبارک حضرت عباس(ع) کے گنبدوں پر سارا سال لہرانے والے سرخ علم اتار کر سیاہ علم نصب کر دیئے گئے ہیں۔

آغاز محرم پر کربلائے معلی کے مقدس مزارات پر علموں کی تبدیلی کو شعائر عزاداری میں اہم مقام حاصل ہے ۔

مراجع کے دفاتر سے محرم الحرام 1443ھ کا چاند نظر آنے کے رسمی اعلان کے بعد گزشتہ سالوں کے برعکس بغیر کسی باقاعدہ تقریب کے علموں کو تبدیل کیا گیا جس کی وجہ عراق سمیت دنیا میں کورونا صورت حال ہے۔

واضح رہے حضرت امام حسین علیہ السلام اور حضرت عباس علیہ السلام کے روضہ مبارک کے گنبدوں پر سارا سال سرخ علم لہراتے ہیں اور یہ سرخ علم اس بات کی علامت ہیں کہ یہ وہ مقتول ہیں کہ جن کے خون کا انتقام لینا باقی ہے خدا کا وعدہ ہے کہ امام زمانہ(عج) اپنے ظہور کے بعد امام حسین علیہ السلام اور شہداء کربلا کے قاتلوں سے ان کے ہر ظلم و ستم کا بدلہ لیں گے تمام مومنین ہر وقت امام زمانہ کے ظہور کی دعا کرتے ہیں تاکہ ان کے ساتھ مل کر امام حسین علیہ السلام اور شہداء کربلا کے قاتلوں سے بدلہ لیا جائے اور پوری دنیا کو انسانیت کے دشمنوں سے پاک کر دیا جائے تاکہ پوری انسانیت سکون اور سعادت کی زندگی گزار سکے۔

حضرت امام حسین علیہ السلام اور حضرت عباس علیہ السلام کے روضہ مبارک کے گنبدوں پر سارا سال لہرانے والے سرخ علموں کو ہر سال محرم کے شروع ہوتے ہی اتار کر ان کی جگہ سیاہ علم نصب کر دئیے جاتے ہیں کہ جو حزن و ملال اور سوگ اور ایام عزاء کی علامت ہیں۔

صدامی و بعثی دور حکومت میں بغیر کسی تقریب کے خاموشی کے ساتھ اس عراقی رسم کو ادا کر دیا جاتا تھا، البتہ ڈکٹیٹر صدامی حکومت کے خاتمے اور مقدس روضوں کے نظام کے مرجعیت کے ہاتھوں میں آنے کے بعد کربلا کے روضوں میں علموں کی تبدیلی کو ایک عالمی تقریبِ عزاء کی صورت دی گئی جس میں شرکت کے لیے ناصرف عراق بلکہ بیرون ملک سے بھی لاکھوں مومنین یکم محرم کی پہلی رات کربلا آتے ہیں اور اس منفرد تقریب عزاء میں اہل بیت اطہار کو پرسہ پیش کرتے ہیں اور حسینی انقلاب کو ہمیشہ زندہ و جاوید رکھنے کے عہد کی تجدید کرتے ہیں۔ اسی طرح کروڑوں مومنین ذرائع ابلاغ کے ذریعے اس تقریب کو دنیا بھر میں براہ راست دیکھتے ہیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

This site uses Akismet to reduce spam. Learn how your comment data is processed.