کس کا عَلَم حسین ؑکے منبر کی زیب ہے​

سقائے اہلِ بیت ؑ کے حضور

کلام : میرزا سلامت علی دبیر (بشکریہ urduweb.org)

کس کا عَلَم حسین ؑکے منبر کی زیب ہے​

کسی جنتی کی مشک سے کوثر کی زیب ہے​

لشکر ہے اُس کی زیب وہ لشکر کی زیب ہے​

چہرے کی فرد مالکِ دفتر کی زیب ہے​

رفعت علم کی کہتی ہے ہر عقل مند سے​

سقے پہ پڑھ درود صدائے بلند سے​

​

کس کے علم کے سائے سے طوبیٰ نہال ہے؟​

سقہ ازل سے کون بہشتی جمال ہے؟​

ہر ماہ کس قمر کا عروج و کمال ہے؟​

وہ رشکِ بدر، حیدرِ صفدر کا لال ہے​

کہتے ہیں شیعیانِ علی کہہ کے ‘یا علی’​

عباس میں ہے دبدبۂ مرتضیٰ علی​

​

یہ اس کی بارگاہِ ملائک پناہ ہے​

دربارِ حق میں جس کی محبت سے راہ ہے​

فوجِ خدا گواہ، خدا بھی گواہ ہے​

عباس، شیرِ بیشۂ شیرِ الٰہ ہے​

تصویر ہے یہ فاتحِ بدر و حنین کی​

شمشیر ہے خدا کی، سپر ہے حسین کی​

​

کیوں حرفِ عین افسرِ عرشِ جلیل ہے؟​

کیوں حرفِ با بہشتِ بریں میں دخیل ہے؟​

کیوں اوجِ آسماں کی الف سے دلیل ہے؟​

کیوں سین سربسر سندِ سلسبیل ہے؟​

سب صورتوں سے حق نے فضائل دکھائے ہیں​

عباس کے خطاب میں یہ حرف آئے ہیں​

​

عرشِ بریں غبار ہے کس بارگاہ کا​

مہرِ مبیں نگینہ ہے کس رشکِ ماہ کا​

کس کا علم نشان ہے فضلِ الٰہ کا​

کس کی وِلا چراغ ہے کوثر کی راہ کا​

پھرتے ہیں کس کے دستِ بریدہ نگاہ میں​

ڈوبے ہوئے ہیں پنجتنی کس کی چاہ میں​

​

کس کے علم سے پنجۂ خورشید زرد ہے​

یہ دھوپ کس کے مرقدِ انور کی گرد ہے​

کس کی ضیا سے چاند کا بازار سرد ہے​

چہرہ وہ ہے کہ دفترِ قدرت میں فرد ہے​

ان کے سخن سے جوہرِ تیغ آشکار ہیں​

خود سیفِ ذوالجلال ہیں، لب ذوالفقار ہیں​

​

صلِ علیٰ، یہ شاہِ شہیداں کا بھائی ہے​

مشکل کشائی آپ نے بابا سے پائی ہے​

شانے نہیں پہ ہاتھ میں مشکل کشائی ہے​

تیغِ خدا کے قبضے میں ساری خدائی ہے​

سقائے شاہِ خشک لباں یہ دلیر ہے​

دریائے آبرو کی ترائی کا شیر ہے​

​

فولاد کی ضریح میں کس کا مزار ہے​

نمگیرہ جس کا رحمتِ پروردگار ہے​

باہم ضریح و قبر سے نور آشکار ہے​

اِس کی بہار وہ ہے یہ اُس کی بہار ہے​

قبر و ضریح سے ہے نمود آب و تاب کی​

وہ آفتاب ہے یہ کرن آفتاب کی​

​

تربت بھی اور ضریح بھی ہے نور سے بھری​

صاحب مزار ماہِ بنی ہاشمی، جری​

تربت پہ وہ ضریح مشبک نہیں دھری​

اُترا ہے برجِ سنبلہ بہرِ مجاوری​

کیا قبر نے ضریح کے رتبے بڑھائے ہیں​

حور و ملک نے دیدۂ حق بیں چڑھائے ہیں​

​

روضے کا فرش قدسیوں کی پاک دامنی​

جھاڑوں سے دونوں وقت ہے دنیا میں روشنی​

کیا جانے واں کی خاک ہے کس نور سے بنی​

ہنگامِ صبح دھوپ، سرِ شام چاندنی​

آتی ہے یہ ندا جو درِ روضہ وا کرو​

خیبر کشا! محبوں کی حاجت روا کرو​

​

روشن چراغ شمعوں سے عقل و شعور کا​

پروانوں کے پروں میں پرا فوجِ حور کا​

قندیل کہہ رہی ہے: میں ایماں ہوں طور کا​

تربت کا یہ سبق ہے کہ سورہ ہوں نور کا​

کیوں کر پڑھیں نہ معتقدِ خاص فاتحہ​

الحمد کی ندا ہے بہ اخلاص فاتحہ​

​

پیارے ستون و سقف ہیں عرشِ جلیل کو​

جیسے عصا کلیم کو کعبہ خلیل کو​

قُبّے کی تازگی سے حیا سلسبیل کو​

سدرہ کی راہ بھولتی ہے جبرئیل کو​

دبتا ہے چرخ گنبدِ انور کی شان سے​

جس طرح پیر زور میں عاجز جوان سے​

​

حاضر جو اس جناب کی درگاہ میں ہوا!​

گھر اس کا شاہ کے دلِ آگاہ میں ہوا​

جو غرق حبِ ابنِ ید اللہ میں ہوا!​

نہرِ لبن سے بہرہ ور اس چاہ میں ہوا​

قربان ہے عرش زائرِ مولا کی شان پر​

سر آستان پر ہے قدم آسمان پر​

​

ہونے کو تو جہان میں کیا کیا نہیں ہوا​

پر حضرتِ حسین سا آقا نہیں ہوا​

عباس سا حسین کا شیدا نہیں ہوا​

سقہ شہید نہر پہ پیاسا نہیں ہوا​

یہ آب و گِل میں حبِ شہِ نیک خو ملی​

جتنی تھی پیاس اس کے سوا آبرو ملی​

​

سقائیِ حسین کی مدت تمام ہے​

پیاسی سکینہ ہے نہ شہِ تشنہ کام ہے​

اب کیوں حضور کا لبِ دریا مقام ہے؟​

درپیش اپنے خاص غلاموں کا کام ہے!​

اب جو کنارہ کش نہیں دریا سے ہوتے ہیں​

شیعہ گناہ کرتے ہیں عباس دھوتے ہیں​

​

چشمِ کرم ہے شیعوں کے حالِ تباہ پر​

جیسے خدا کی مِہر حسینی سپاہ پر​

یوں بند ہے زبانِ سخن عذر خواہ پر​

جیسے کھلا ہوا درِ توبہ گناہ پر​

مشرق کا سکہ مِہر ہے مغرب کا ماہ ہے​

دن رات اختیارِ سفید و سیاہ ہے​

​

بے دست و پا کے کام سرِ دست آتے ہیں​

پاؤں کے ناخنوں سے گرہ کھول جاتے ہیں​

قاتل کو طُرفہ زورِ شہادت دکھاتے ہیں​

شب کو اسے جَلاتے ہیں دن کو جلاتے ہیں​

سب اُن کے اختیار سے بے اختیار ہیں​

کیا کہیے اور قدرتِ پروردگار ہیں​

​

کہتا ہے اک مجاورِ فرزندِ مرتضیٰ​

شب کو بھی باریاب میں ہوتا تھا بارہا​

اک شخص دفن صحنِ علم دار میں ہوا​

اُس شب گیا جو روضے میں تو دیکھتا ہوں کیا​

آ کر گرا وہ شعلہ کہ شورِ فغاں اٹھا​

فانوسِ قبر جلنے لگی اور دھواں اٹھا​

​

مردے نے پھر تو دھوم مچائی دُہائی ہے​

اے حضرتِ حسین کے بھائی، دُہائی ہے​

نارِ سقر جلانے کو آئی، دُہائی ہے​

یاں بھی نجات ہم نے نہ پائی، دُہائی ہے​

سقائے دخترِ شہِ ابرار، الغیاث​

عباس الغیاث، علم دار الغیاث​

​

اُس عارضِ سکینہ کی مولا تمہیں قسم​

شمرِ لعیں کی جس پہ لگی سیلیِ ستم​

اُس ناتواں کے واسطے، اے صاحبِ کرم!​

جو بیڑیوں کے بوجھ سے گرتا تھا ہر قدم​

مجھ سے فلک کے رنگ بدلنے کو دیکھیے​

روضے کو اپنے اور مرے جلنے کو دیکھیے​

​

کہتا تھا یہ کہ نار وہیں نور ہو گئی​

زیرِ کفن جو آگ تھی کافور ہو گئی​

فانوسِ قبر قمقمۂ طور ہو گئی​

آئی ندا کہ خوش ہو بلا دور ہو گئی​

ہم کو رلا دیا جو ترے شور و شین نے​

تجھ کو بچا لیا مرے آقا حسین نے​

​

کیوں مومنو! کہاں سے کہاں ہے یہ معجزہ​

آیاتِ کبریا کا نِشاں ہے یہ معجزہ​

عاجز کنندۂ دو جہاں ہے یہ معجزہ​

دشمن بھی کہہ رہے ہیں کہ ‘ہاں ہے یہ معجزہ’​

عباس چاند ہیں شہِ بدر و حنین کے​

لیکن یہ سارے جلوے ہیں حبِ حسین کے​

​

دیکھی جہاں ضریح شہِ کم سپاہ کی​

پہلو میں اس کے اُن کے علم پر نگاہ کی​

شربت پہ ہے جو نذرِ شہِ دیں پناہ کی​

حاضر ہے حاضری بھی علمدارِ شاہ کی​

کچھ شیعہ ‘یا حسین’ بصد یاس کہتے ہیں​

کچھ رو کے ‘ہائے حضرتِ عباس’ کہتے ہیں​

​

وہ رازِ حق، تو سینۂ مشکل کشا یہ ہیں​

علمِ خدا وہ ہیں، تو دلِ مرتضی یہ ہیں​

حسنِ قبول وہ ہیں، علی کی دعا یہ ہیں​

عیسیٰ گواہ ہیں کہ شفا وہ، دوا یہ ہیں​

غازی کے سر پہ شاہِ حجازی کے ہاتھ ہیں​

حق ہے علی کے ساتھ، علی حق کے ساتھ ہیں​

​

بچپن سے تھے یہ عاشقِ سلطانِ مشرقین​

طاعت خدا کی جانتے تھے طاعتِ حسین​

آقا کے دیکھنے کو سمجھتے تھے فرضِ عین​

اور بے طوافِ کعبۂ رخ، دل کو تھا نہ چین​

جھکنا قدم پہ شاہ کے معراج تھی اُنہیں​

نعلینِ ابنِ فاطمہ سرتاج تھی اُنہیں​

​

لیتے تھے اٹھتے بیٹھتے شبیر کا جو نام​

ہنس ہنس کے اُن سے والدہ کرتی تھی یہ کلام​

تم کون ہو حسین کے؟ یہ کہتے تھے، غلام​

وہ پوچھتی تھی، کچھ سند اے عاشقِ امام!​

قیمت میں کیا دیا ہے شہِ مشرقین نے​

کتنے کو – واری – مول لیا ہے حسین نے​

​

یہ کہتے تھے: غلام بھی حاضر جواب ہے​

اس بات کی حضور، نہیں دل کو تاب ہے​

دعویٰ تمہیں بتول سے کیا اے جناب ہے؟​

کہتی ہو، میری بی بی وہ عفت مآب ہے​

آقا ہے یہ مرا جو وہ بی بی تمہاری ہے​

قیمت جو آپ کی وہی قیمت ہماری ہے​

​

بے ساختہ لپٹ کے وہ کہتی تھی ‘مرحبا’​

کیا ڈھونڈ کر جواب دیا، واری، واہ وا​

تیوری نہ اب چڑھائیے، بس غصہ ہو چکا​

کچھ خیر ہے میں ہنستی تھی، تم ہو گئے خفا​

شفقت رہے مُدام شہِ مشرقین کی​

روزی نصیب تم کو غلامی حسین کی​

​

اب روئیں مومنین کہ شبیر روتے ہیں​

نامی جواں تو گنجِ شہیداں میں سوتے ہیں​

بچے تمام پیاس سے جاں اپنی کھوتے ہیں​

اور اب جدا حسین سے عباس ہوتے ہیں​

خالی رفیق و یار سے ہے پہلوئے حسین​

کس وقت توڑتی ہے اجل بازوئے حسین​

​

آرام جانِ فاطمہ اب بے قرار ہے​

رو دیتے ہیں، کچھ اور نہیں اختیار ہے​

اتنا ہی غم ہے جتنا کہ بھائی کا پیار ہے​

پھر ماتمِ علیِ ولی رُو بَکار ہے!​

حضرت کو موت ان کی جدائی کا داغ ہے​

یہ داغ اور کا نہیں بھائی کا داغ ہے​

​

پوچھو علی کی روح سے یہ حالِ دردناک​

کیسا کفن، جگر ہے امیرِ عرب کا چاک​

اب تک نجف میں کانپ رہا ہے مزارِ پاک​

کہتے ہیں انبیائے سَلَف یہ اڑا کے خاک​

عباس نام ناموری داشتی چہ شد؟​

یا مرتضی علی! پسری داشتی چہ شد؟​

​

جب رن میں گل چراغِ مزارِ حسن ہوا​

یعنی شہید قاسمِ گل پیرہن ہوا​

رختِ شہانہ لاش کی خاطر کفن ہوا​

حجلہ دولہن کے واسطے بیت الحزن ہوا​

غل تھا اُدھر تو دولہا کو مہمان روتے ہیں​

یاں شاہ سے وداع علمدار ہوتے ہیں​

​

ہوتا ہے بے پسر پدرِ شیعیانِ پاک​

کیسا کفن، جگر ہے امیرِ عرب کا چاک​

چھپتا ہے چاند ہاشمیوں کا بزیرِ خاک​

افلاک پر ہے فاطمہ کی آہِ دردناک​

واں عرش ہل رہا ہے فغانِ حسین سے​

یاں حشر ہے حسینیوں کے شور و شین سے​

​

تصویرِ خاصِ حیدرِ کرار مٹتی ہے​

تفسیرِ نورِ خالقِ غفار مٹتی ہے​

لشکر کے بعد شکلِ علمدار مٹتی ہے​

شیعوں کے بادشاہ کی سرکار مٹتی ہے​

افسوس، جس کی مادرِ بیوہ وطن میں ہے​

باری اب اُس جوان کے مرنے کی رن میں ہے​

​

تمہید شہ سے بہرِ اجازت اٹھائی ہے​

جوڑے ہیں ہاتھ، پاؤں پہ گردن جھکائی ہے​

یوں حرف زن وہ فدیۂ حق کا فدائی ہے​

سب مر چکے غلام کی باری اب آئی ہے​

کوثر دیا شہیدوں کو مولا ہمیں بھی دو​

اک قبر کی جگہ لبِ دریا ہمیں بھی دو​

​

سوکھے ہیں ساتویں سے لبِ شاہِ بحر و بر​

ہوتا ہے خون خشک مرا دیکھ دیکھ کر​

آنکھیں ملا کے کہتے ہیں خادم سے بدگہر​

سقائے اہلِ بیت ہو تو آؤ نہر پر​

تم بھی فقط زبان سے قربان جاتے ہو​

پانی نہیں امام کو اپنے پلاتے ہو؟​

​

دیکھی ہیں جاں نثار نے آنکھیں حضور کی​

چشمک زنی اٹھے گی نہ اہلِ غرور کی​

حالت ہے اب تباہ دلِ ناصبور کی​

آیندہ جو رِضا ہو امامِ غیور کی​

گو بے کفن ہے بھائی ہر اک اس غلام کا​

پر مجھ کو غم ہے خشکیِ حلقِ امام کا​

​

صِفّین میں بھی گھیرے تھے یہ نہر خود پسند​

فوجِ معاویہ لبِ دریا تھی بہرہ مند​

مشکل کشا کی فوج پہ آبِ رواں تھا بند​

تھی مورچوں سے ‘وا عطشاء’ کی صدا بلند​

پر مضطرب نہ والدِ عالی صفات تھے​

اصغر سے ننھے بچے نہ بابا کے سات تھے​

​

طاقت دکھائی آپ نے زہرا کے شِیر کی​

دیکھی گئی نہ پیاس جنابِ امیر کی​

سقائی کی سپاہِ شہِ قلعہ گیر کی​

الٹیں صفیں جناب نے فوجِ شریر کی​

بابا کو لا کے نہر سے پانی پلا دیا​

سب مر چکے تھے پیاس سے تم نے جِلا دیا​

​

آقا نے میرے حقِ پدر یوں ادا کیا​

فرمائیے، غلام نے حضرت سے کیا کیا​

فدوی کو پال پوس کے تم نے بڑا کیا​

بابا کے آگے بھی تمہیں ‘بابا’ کہا کیا​

میں جانتا ہوں قبلۂ کونین آپ کو!​

اور دیکھتا ہوں پیاس سے بے چین آپ کو​

​

اصرار کر کے آپ نے بابا سے لی رضا​

میں بار بار عرض کروں یہ مجال کیا​

جو ناز کرتے آپ علی سے وہ تھا بجا​

سبطِ نبی ہو اور پسرِ اشرف النسا!​

پڑھتا ہوں کلمہ آپ کے میں نانا جان کا​

ہے فرق مجھ میں تم میں زمیں آسمان کا​

​

پانی ہے جب سے بند مجھے انفعال ہے​

کہتا ہوں دل سے صبر کر اب انفصال ہے​

حضرت کو آبرو کا مری خود خیال ہے​

اب بھی مُصِر نہیں ہوں فقط عرضِ حال ہے​

یوں فوج کو نہ کوئی علمدار روئے گا​

ایسا بھی واقعہ نہ ہوا ہے نہ ہوئے گا​

​

صِفّین میں جو پیاسے شہِ ذوالفقار تھے​

منہ اُن کا دیکھ دیکھ کے آپ اشکبار تھے​

پھرتے تھے آس پاس بہت بے قرار تھے​

عباس کی طرح سے نہ بے اختیار تھے​

اپنا ہی سا ہر ایک کا دل جان لیجیے​

اب تو غلام کا بھی سخن مان لیجیے!​

​

تم باپ کی جگہ ہو یہ خادم پسر کی جا​

صفین کا وہ دشت تھا یہ دشتِ کربلا​

واں اک معاویہ تھا، یہاں لاکھ اشقیا​

واں ابتدا تھی پیاس کی اور یاں ہے انتہا​

شامی وہی ہیں اور وہی نہرِ فرات ہے​

انصاف اب غلام کا آقا کے ہات ہے​

​

رو کر کہا حسین نے: دریا پہ جاؤ گے؟​

عباس پانی لاؤ گے، ہم کو پلاؤ گے!​

واللہ بھائی داغِ جوانی دکھاؤ گے​

ہم آئے تھے فرات سے پر تم نہ آؤ گے​

سمجھو تو خیمہ کیوں لبِ دریا سے اٹھ گیا​

پانی مرے نصیب کا دنیا سے اٹھ گیا​

​

صفین میں گیا تھا جو دریا پہ میں حزیں​

بابا بھی میرے بے کس و تنہا تھے کیا یونہیں؟​

حیدر کو میرے پانی کے لانے کا تھا یقیں​

ہم کو تو آس آپ ہی کے آنے کی نہیں​

یہ جان لو جدا جو ہوئے تم تو ہم نہیں​

کٹنے سے سر کے ٹوٹنا بازو کا کم نہیں​

​

بھائی! جدائی بھائی کی، بھائی کی ہے قضا​

بن ہاتھ کا کرے نہ کسی بندے کو خدا​

اکبر عصا ہے میری ضعیفی کا، یہ بجا​

پر ہاتھ ہی نہ ہوں گے تو بے کار ہے عصا​

کس درد سے جگر کا مرے سامنا ہوا​

دشوار اب حسین کو دل تھامنا ہوا​

​

خیمے کے ایک گوشے میں یہ حشر تھا بپا​

اور سن رہی تھی چپکی سکینہ یہ ماجرا​

مولا جو چپ ہوئے تو پکاری وہ مہ لقا​

اے لوگو! یاں تو آؤ کہ یہ گفتگو ہے کیا​

دریا کے آنے جانے کے کچھ ذکر ہوتے ہیں​

اے لو، چچا بھی روتے ہیں بابا بھی روتے ہیں​

​

شہ سے کہا: چچا کو نہ آنسو بہانے دو​

اچھا تو کہتے ہیں، انہیں دریا پہ جانے دو​

پانی حضور کے لیے لاتے ہیں لانے دو​

غصے کی آنکھ اہلِ ستم کو دکھانے دو​

پانی جو آپ کے لیے عباس لائیں گے​

صدقہ تمہارا ہم بھی کوئی گھونٹ پائیں گے​

​

میں بیچ میں پڑوں جو یہ ضامن کسی کو دیں​

ضامن جو دیں تو روحِ جنابِ علی کو دیں​

ایسا نہ ہو کہ رنج یہ میری چچی کو دیں​

عباس بولے: آپ تسلی یہ جی کو دیں​

مولا بھی ہیں حسین مرے اور امام بھی​

آقا کو بھول جاتا ہے کوئی غلام بھی​

​

صدقے چچا، نثار چچا التجا کرو​

کچھ تو سفارش اور برائے خدا کرو​

حضرت سے جو کہا تھا ابھی پھر ادا کرو​

حاجت روا کی پوتی ہو، حاجت روا کرو​

ضامن چچا کے آنے کی ہوتی ہو کیوں نہ ہو​

حلّالِ مشکلات کی پوتی ہو کیوں نہ ہو​

​

لے لو قسم فرات سے آگے نہ جائیں گے​

اور جائیں گے تو کیا شہِ دیں لے نہ آئیں گے​

دل میں کہا امام نے ہاں لاش لائیں گے​

پر کیوں کر ایسے شیر کا مردہ اٹھائیں گے​

حضرت نے اس خیال میں دریا بہا دیا​

عباس کو سکینہ نے مشکیزہ لا دیا​

​

رو کر پکارے عترتِ اطہار، الوداع!​

عباس الوداع، اے علم دار الوداع​

اے زیبِ پہلوئے شہِ ابرار! الوداع!​

اے نام دارِ حیدرِ کرار، الوداع!​

جعفر کی روح آپ کے لاشے پہ روئے گی​

ہے ہے اب اس علم کی زیارت نہ ہوئے گی​

​

زینب نے بڑھ کے کان میں سقے کے کچھ کہا​

سنتے ہی بہرِ سجدہ جھکا ابنِ مرتضیٰ​

زینب سے پوچھنے لگیں رانڈیں جدا جدا​

ہم سے بھی کہہ دو، بھائی سے ارشاد کیا کیا؟​

بانچھیں خوشی سے کھل گئیں اس باتمیز کی​

بولو! قسم حسین کی جانِ عزیز کی​

​

رو کر کہا یہ زینبِ عالی مقام نے​

ام البنین پھرتی ہے آنکھوں کے سامنے​

یثرب سے جب کہ کوچ کیا تھا امام نے​

کی تھی سفارش اِن کی یہ اُس نیک نام نے​

جب مشک یہ اٹھائیں سبک دوش کیجیو​

میری طرف سے دودھ مرا بخش دیجیو​

​

لوگو گواہ رہیو کہ تم سب کے سامنے​

اُن کا سخن ادا کیا مجھ تشنہ کام نے​

کھوئے حواس بیبیوں کے اِس کلام نے​

پردہ اٹھایا بازوئے شاہِ انام نے​

جھک کر ہلال برجِ فلک سے نکل گیا​

نورِ نگاہ تھا کہ پلک سے نکل گیا​

​

عباس جب کہ جانبِ باغِ جناں چلے​

شانے پہ لاکھ شان سے رکھ کر نشاں چلے​

زوجہ نے پوچھا: اے مرے والی، کہاں چلے؟​

بولے: جہاں سے اب نہ پھریں گے، وہاں چلے​

اب آخری وداع کی باری نہ آئے گی​

آئی ہے سب کی لاش ہماری نہ آئے گی​

​

عباس سے سنا جو یہ اس تشنہ کام نے​

دنیا سیاہ ہو گئی آنکھوں کے سامنے​

اک آہ کی کمر کو پکڑ کر امام نے​

پردہ اٹھایا بازوئے شاہِ انام نے​

جھک کر ہلال برجِ فلک سے نکل گیا​

نورِ نگاہ تھا کہ پلک سے نکل گیا​

​

پاسِ ادب سے مجرے کو سب دور دور آئے​

عفوِ قصور کے لیے کبر و غرور آئے​

غل پڑ گیا، جِلَو کے لیے فوجِ نور آئے​

ہاں لاؤ مرکبِ دورکابہ، حضور آئے​

آیا سجا سجایا تگاور جناب کا!​

پاکھر کرن کے تاروں کی، زین آفتاب کا​

​

پابوسی کو رکاب کا حلقہ وہاں بنا​

اور اُس دہن میں پائے مبارک زباں بنا​

پھر آستانِ خانۂ زین آسماں بنا​

عرشِ جلیل زینِ تجلی نشاں بنا​

آنسو مگر نہ تھمتا تھا اُس راہوار کا​

یعنی مجھی پہ آئے گا لاشہ سوار کا​

​

انگلی سے لکھ کے گردنِ توسن پہ ‘یا علی’​

اک جست میں سوار ہوا حق کا وہ ولی​

فی الفور نور و طور کے معنی ہوئے جلی​

بجلی جلانا بھول کے خود رشک سے جلی​

ٹھنڈی ہوئی ہوا جو یہ گرمِ عناں ہوا​

صرصر کی سانس رک گئی جب یہ رواں ہوا​

​

رکھنے لگا جو ہاتھ تصور عنان پر​

بگڑا بنا کے منہ کہ نہ کھیل اپنی جان پر​

بولی زمیں ‘کدھر’؟ تو کہا ‘آسمان پر’​

پوچھا جو آسماں نے، کہا، ‘لامکان پر’​

یہ کہہ کے فکر و وہم کی حد سے گذر گیا​

سایہ ہوا سے پوچھ رہا تھا کدھر گیا​

​

غل، ہر مکاں سے ‘واہ’ کا تا لامکاں اٹھا​

ایسا جھکا کہ پھر نہ سرِ آسماں اٹھا​

شعلہ علم کے نور سے اک ناگہاں اٹھا​

جنگل میں دھوپ جل گئی کوسوں دھواں اٹھا​

انسان کیسے جان جنوں کی نکل گئی​

گاوِ زمیں یہ تڑپی کہ مچھلی اچھل پڑی​

​

کچھ عقل سے سروں میں نہ بن آئی، گر پڑی​

تسکین نے کہیں نہ جگہ پائی، گر پڑی​

ہر سقفِ سینہ خوف سے تھرائی، گر پڑی​

لرزے یہ طاقِ چشم کہ بینائی گر پڑی​

قائم نہ دین لشکرِ کفار کا رہا​

۔۔۔ ۔۔۔ وحدتِ غفار کا رہا​

​

خیبر شکن کے لال کی آمد ہے صف شکن​

گرتی ہے فوج فوج پہ، پڑتا ہے رن پہ رن​

تیغِ خدا کی تیغ کا سایہ ہے تیغ زن​

غلطاں کہیں قدم ہے، کہیں سر، کہیں بدن​

نے حوصلہ، نہ بغضِ امامِ مبیں رہا​

اب دل میں بھاگنے کے سوا کچھ نہیں رہا​

​

آمد کی غلغلے سے پراگندہ ہوش ہیں​

قبریں کفن سے مردوں کی پنبہ بگوش ہیں​

گاہک اجل کے شامیِ ایماں فروش ہیں​

بازار مثلِ شہرِ خموشاں خموش ہیں​

پیدل جِلو میں خضر اور الیاس آتے ہیں​

اک دھوم ہے حضرتِ عباس آتے ہیں​

​

اب فرقِ روز و شب سپہِ شام کو نہیں​

ہلنے کا ہوش گردشِ ایام کو نہیں​

دنیا میں آبرو کسی صمصام کو نہیں​

سُوفار کے لبوں پہ ہنسی نام کو نہیں​

تیروں سے بے گریز نہ کچھ رن میں بن پڑی​

ترکش میں آستین کی صورت شکن پڑی​

بڑھ کر کہا عمر نے وحیدِ زماں یہ ہے​

ہم نامِ ذوالجلال کا نام و نشاں یہ ہے​

ہاں لشکرِ خدا کا نمودی جواں یہ ہے​

جعفر شکوہ، حمزۂ صاحب قِراں یہ ہے​

سیفِ خدا خطاب ہے عباس نام ہے​

یہ بازوئے حسین علیہ السلام ہے​

​

عباس بولے مدح کے قابل امام ہیں​

بھائی بھی اُن کے بس حسنِ سبز فام ہیں​

باقی جو اور بھائی ہیں وہ سب غلام ہیں​

وہ رہنما وہ قبلۂ ہر خاص و عام ہیں​

گمراہ ہے تو دور ہو، جا اپنی راہ لے​

ورنہ یہ ہے نبی کا علم، آ، پناہ لے​

​

ذکرِ حسین حور و ملک کا وظیفہ ہے​

تیرا خلیفہ طالبِ دنیائے جیفہ ہے​

وہ ہے خلافِ حق یہ نبی کا خلیفہ ہے​

وہ خود غلط ہے اور یہ خدا کا صحیفہ ہے​

ناداں بتا! خدا کا شناسا نہیں حسین؟​

لے تو ہی کہہ نبی کا نواسہ نہیں حسین؟​

​

یہ رتبہ زر کے زور سے حاشا نہ ہوئے گا​

ادنیٰ ہوا و حرص سے اعلا نہ ہوئے گا​

فرعون جا کے طور پر موسیٰ نہ ہوئے گا​

حکمت سے اپنی کوئی مسیحا نہ ہوئے گا​

کس نے دی انگوٹھی رکوع و سجود میں​

آیا نہ آیہ مثلِ علی مدح وجود میں​

​

ہر سبز پوش خضر نہیں عز و جاہ میں​

سرسبز حیدری ہیں جنابِ الٰہ میں​

یوسف نہ ہوگا لاکھ گرے کوئی چاہ میں​

دن رات کا ہے فرق سپید اور سیاہ میں​

کوئی یتیم فاطمہ سا خوش گہر نہیں​

ہر اک یتیم دُرِّ یتیم، اے عمر نہیں​

​

چاہے زِرہ بنا کے جو داؤد کا وقار​

واللہ، جعل ساز ہے، کیا اس کا اعتبار​

ہر بخیہ گر نہ ہو کبھی ادریسِ نام دار​

ہر ناخدا کو ‘نوح’ کہے گا نہ ہوشیار​

کیا جاہلوں کے عیش کا سامان ہو گیا​

بیٹھا جو تخت پر وہ سلیمان ہو گیا​

​

گوسالے نے کیا تھا جو دعویٰ، تو کیا ہوا​

کہہ تو ہی صدق کذب ہوا، بت خدا ہو؟​

یوں ہی یزید بھی جو خلیفہ ہوا، ہوا​

باطل نہ اُس سے حقِ امامِ ہُدا ہوا​

جس طرح سے خدا کوئی غیر از خدا نہیں​

یوں ہی بجز حسین امامِ ہُدا نہیں​

​

وارث ہر اک نبی کا ہے یہ سیدِ جلیل​

بیٹے کو ذبح کرنے لگے جس گھڑی خلیل​

دنبہ ریاضِ خلد سے لے آئے جبرئیل​

فدیہ ہوا ذبیح کا حیوانِ بے عدیل​

نعلین اس کے پوست کی ہے شہ کے پاؤں میں​

اور چتر حق کے سائے کی ہے دھوپ چھاؤں میں​

​

قرآں ورق ورق سے سپر ہے حسین کی​

چشمِ نبی زرہ ہے شہِ مشرقین کی​

اور تیغِ تیز فاطمہ کے نورِ عین کی​

ہے ذوالفقار فاتحِ بدر و حنین کی​

اتری تو ہے زمین پہ عرشِ جلیل سے​

پر کاٹنے کا حال کھلا جبرئیل سے​

​

جس کی زمین عرش ہے وہ گھر ہمارا ہے​

کرسی خدا کے نور کی منبر ہمارا ہے​

ایماں ہے جس کی فرد وہ دفتر ہمارا ہے​

مکتب ازل سے عرشِ منور ہمارا ہے​

احمد مدینہ علم کے، در بوتراب ہے​

اس باب میں حدیثِ رسالت مآب ہے​

​

اپنی ولا سے فوق ملک پر ہے روح کو​

ہم روحِ تازہ دیتے ہیں سام ابنِ نوح کو​

حکمِ خدا سے قبض بھی کرتے ہیں روح کو​

ہم کھولتے ہیں جنگ میں بابِ فتوح کو​

فیصل ہوا ہے قول یہ خیبر کے قصے میں​

آیا ہے لافتیٰ مرے بابا کے حصے میں​

پہلے مصرعے میں روح= جبرئیل​

​

لذت ملے گی حشر کے دن ان کلاموں کی​

جس دم نکل پڑے گی زباں تشنہ کاموں کی​

کوثر نبی کا ہو گا حکومت اماموں کی​

سقائی ہم کریں گے علی کے غلاموں کی​

آلِ رسول مالکِ روزِ حساب ہے​

کیا قہر ہے انہیں کے لیے قحطِ آب ہے​

​

یہ دن وہ ہیں تپش کے کہ سب رحم کھاتے ہیں​

اکثر سبیلیں رکھتے ہیں، پانی پلاتے ہیں​

پردیسیوں کو سائے میں لا کر بٹھاتے ہیں​

یاں اپنے مہمانوں سے پانی چھپاتے ہیں​

ہے ہے قلق یہ ہوں چھ مہینے کی جان کو​

آنکھیں پھرا کے ہونٹوں پہ پھیرے زبان کو​

​

اب بھی سمجھ خدا کے لیے، آ، جناں میں آ​

دے پانی، لے بہشت، نہ جا نار میں، نہ جا​

بیعت ہے ابنِ فاطمہ کی بیعتِ خدا​

تیری بھلائی کے لیے کہتے ہیں، ہم کو کیا​

سب خاک ہے، نہ زر نہ پسر کام آئیں گے​

تربت میں بوتراب ہی آ کر بچائیں گے​

​

بولا وہ منہ پھرا کے ۔ سنو اے گروہِ شام!​

لو، ہم سے لینے آئے ہیں یہ بیعتِ امام​

میں حُر نہیں کہ مان لوں۔ حاکم کا ہوں غلام​

دنیا مجھے پسند ہے، ایمان کو سلام​

بیعت یزید کی تو نہ شاہِ امم کریں؟​

قدرت خدا کی، بیعتِ شبیر ہم کریں؟​

​

یاں کان آشنا تھے کب اس بول چال سے​

دیکھا لرز کے تیغ کو قہر و جلال سے​

بھاگا چھپا کے روئے سیہ کو وہ ڈھال سے​

بادل اٹھے نشانوں کے دشتِ قتال سے​

تیغیں اُپی ہوئیں جو یکایک نکل پڑیں​

بازو کی مچھلیاں سرِ بازو اچھل پڑیں​

​

بڑھ کر نقیب بولے کہ ہاں، سرفروشو ہاں​

شیرو، دلیرو، غازیو! تازی کی لو عناں​

مرتے ہیں مرد نام پہ، نامرد بہرِ ناں​

سنبھلے ہوئے، کہ سامنے ہے ہاشمی جواں​

لینا نہ منہ پہ ڈھال کہ ہستی حباب ہے​

دینا نہ آبرو کہ یہ موتی کی آب ہے​

​

بولی یہاں رضائے خداوند ذوالجلال​

بسم اللہ اے جنابِ امیرِ عرب کے لال​

عدلِ خدا پکارا کہ خونِ عدو حلال​

پنجہ بڑھایا مہرِ علی نے سوئے ہلال​

قبضہ وفورِ شوق سے دو ہاتھ اچھل پڑا​

قالب سے ماہِ نو کے مہِ نو نکل پڑا​

​

نکلی غلافِ نور سے تفسیرِ جوہری​

یا آ کے دست بوسِ سلیماں ہوئی پری​

یا حجلے سے عروس نے کی جلوہ گستری​

یا تھی یہ شاخِ میوۂ طوبیٰ ہری بھری​

اس ہاتھ سے مرادیں تھیں جو جو وہ مل گئیں​

باچھیں خوشی سے تیغ کے قبضے کی کھِل گئیں​

​

شاخِ نیام سے ہوا اس طرح پھل جدا​

پیروں کے قد سے جیسے جوانی کا بل جدا​

ہستی جدا زمین پہ تڑپی، اجل جدا​

خنجر جدا فلک پہ گرا اور زحل جدا​

غل تھا کہ اب مصالحۂ جسم و جاں نہیں​

لو تیغِ برق دم کا قدم درمیاں نہیں!​

​

سایہ بھی صاف تیغ سے فوراً جدا ہوا​

مطلب ملا کہ پانی سے روغن جدا ہوا​

تنہا نہ رنگِ چہرۂ دشمن جدا ہوا​

گردن سے سر، تو روح سے ہر تن جدا ہوا​

پیہم صدا دلوں کے دھڑکنے کی آتی تھی​

آوازِ بوق اٹھتی تھی اور بیٹھ جاتی تھی​

​

سیدھی ہوئی جو تیغ تو لشکر الٹ گیا​

میداں سے پاؤں، جینے سے دل سب کا ہٹ گیا​

سب رو رہے تھے زور کو واں، سن بھی گھٹ گیا​

مانندِ ناف خوف سے سینہ سمٹ گیا​

بولی یہ تیغ دم سرِ اعدا پہ لوں گی میں​

بُرّش پکاری تو بھی ٹھہرنے نہ دوں گی میں​

​

پڑھتی ہوئی زبان سے وہ ‘لا فتا’ چلی​

‘روشن نگاہ’ کہنے کو آگے قضا چلی​

بائیں کو قہر داہنی جانب بلا چلی​

بالکل چراغِ عمر ہوئے گل ہوا چلی​

کہیے نہ تیغ دولھا کو برچھی لگائی تھی​

ابنِ حسن کی آہ نے بجلی گرائی تھی!​

​

پھل وزن میں تھا پھول، تجلی میں نخلِ طور​

گرمی میں محض نار تو نرمی میں صاف نور​

آسیب سایہ، چال پری، قبضہ چشمِ حور​

خود لہر، آب زہر، تڑپ قہر، شور صور​

یوں دفعتاً زمیں سے گئی آسمان پر​

جس طرح غصہ آئے کسی ناتوان پر​

​

تیغیں بڑھیں تو اور گھٹی شانِ اشقیا​

دستِ سوال جیسے سب اعضا میں بدنما​

الزام ان کی تیغ نے سب تیغوں کو دیا​

گرمی سے اس کی سرد تھے اعدا کے دست و پا​

جوہر کے خرمنوں پہ یہ مثلِ شرر گری​

ہر تیغ پھلجڑی کی طرح چھوٹ کر گری​

​

پھر تو پکار تھی یہ اِدھر، وہ اُدھر گرا​

وہ نیمچہ، وہ ہاتھ، وہ خود، اور وہ سر گرا​

بن بن کے برق، سایۂ تیغِ ظفر گرا​

واں مورچے سے باپ اٹھا، یاں پسر گرا​

گر گر کے سر یہ رن میں برابر تپاں ہوئے​

جو رن میں سرزمین کے معنی عیاں ہوئے​

​

اس تیغ سے تھا سارے زمانے میں ماہِ عید​

روشن تھا پنجتن کے گھرانے میں ماہِ عید​

آنے میں روزِ وعدہ تو جانے میں ماہِ عید​

صائم کو تھا غذا کے کھلانے میں ماہِ عید​

دل کے شکست ہونے سے روزے کا در کھلا​

برسوں کے بعد روزۂ فتح و ظفر کھلا​

​

مشکل ہے ابتدا بہ سکوں، سب کو ہے خبر​

کلیہ یہ حسام نے باطل کیا مگر​

ساکن بنائی زخم کے جِرموں سے سینِ سر​

سب وقف پیشِ تیغ تھے، کیا زیر کیا زبر​

آخر کی صف میں کچھ حَرَکَت آشکار تھی​

سو بسملوں کی طرح وہ بے اختیار تھی​

​

دینارِ تیغ رونقِ بازار ہو گیا​

نادار اُس کے چلتے ہی زردار ہو گیا​

اور دور مفلسی کا سب آزار ہو گیا​

یہ آبِ تیغ شربتِ دیدار ہو گیا​

صد پارہ رن میں قالبِ ہر بیدریغ تھا​

اس تیغ میں یہ خوردۂ دینار تیغ تھا​

​

آندھی تھی گرد، گھوڑے نے وہ خاک اڑائی تھی​

دریائے تیغ نے نئی گرمی دکھائی تھی​

آندھی نے آگ پانی کے اندر لگائی تھی​

نعلوں کی بجلیوں سے ہر اک صف جلائی تھی​

چل پھر سے اس کی تیغ کی جنبش زیاد تھی​

کشتیِ تیغ کے لیے بادِ مراد تھی​

​

چہروں پہ مردنی کی طرح تیغ چھا گئی​

ہر استخواں میں مثلِ تپِ دق سما گئی​

اعجازِ خاکساریِ حیدر دکھا گئی​

مانندِ خاک ناریوں کے تن کو کھا گئی​

سب کے گلوں سے ملتی تھی لیکن رکی ہوئی​

جوہر یہ تھے کہ بوجھ سے تھی خود جھکی ہوئی​

​

باطل کو حق سے، تیغ نے یوں کر دیا پرے​

خورشید جیسے رات کو دن سے جدا کرے​

خالی طرارے رخشِ جہندہ نے جو بھرے​

میدان سے ہرن ہوئے روباہوں کے پرے​

شعلہ جو اس کے مشعلِ سُم سے عیاں ہوا​

کیا کیا چراغ پا فرسِ آسماں ہوا​

​

آتے تھے جوڑ توڑ غضب تیغِ تیز کو​

سر سے ملی جدا کیا پائے گریز کو​

اپنے سے گرم دیکھ کے اس شعلہ ریز کو​

برق و شرر نے نذر کیا جست و خیز کو​

بو گل نے رنگ لالے نے سرعت ہوا نے دی​

یہ ہدیہ کیا ہے اپنی نیابت قضا نے دی​

​

قربان، فیضِ بازوئے شاہِ جلیل پر​

ترجیح دستِ جود کو ہے سلسبیل پر​

یوں فوج کا ہجوم تھا تیغِ اصیل پر​

گرمی میں جیسے پیاسوں کا بلوہ سبیل پر​

تازے خواص تیغِ رواں نے دکھا دیے​

پانی کے بدلے پیاس کے تیور بجھا دیے​

​

ڈوبی سپر میں گر کے نئی چال ڈھال سے​

پاکھر کے بیچ میں نہ پڑی سیدھی چال سے​

اٹھ کر زرہ میں آئی شکوہ و جلال سے​

اک جال میں تڑپ کے گئی ایک جال سے​

گذری جو چار آئینے سے منہ کو موڑ کے​

غل تھا پری نکل گئی شیشے کو توڑ کے​

​

سُکّانِ شام و کوفہ میں اک باخدا نہ تھا​

ان کا سوائے قہرِ خدا ناخدا نہ تھا​

مطلب بجز خلاصیِ جاں تیغ کا نہ تھا​

ڈوبا وہی حسین سے جو آشنا نہ تھا​

رنگِ سیہ کے اڑنے میں یہ امتیاز تھا​

دریائے تیغ میں وہ دھویں کا جہاز تھا​

​

بازو و دست و گردن و سر بہتے پھرتے تھے​

گھوڑے اِدھر، سوار اُدھر بہتے پھرتے تھے​

طائر تھے آشیانوں میں پر بہتے پھرتے تھے​

سب سنگ دل تھے کوہ، مگر بہتے پھرتے تھے​

نے مرتے تھے نہ جیتے تھے لیکن سسکتے تھے​

بھیگے تھے مرغِ روح کے پر اڑ نہ سکتے تھے​

​

قربانِ برق و بارقۂ تیغِ شعلہ تاب​

موتی کی آب و تاب، سمندر کا پیچ و تاب​

خود نوح، خود سفینہ و خود ماہی و خود آب​

سرگوشیاں فرات میں کرنے لگے حباب​

ظرفِ تنک میں تھی نہ جگہ اس کے آب کی​

بندھتی تھی اور کھلتی تھی مٹھی حباب کی​

​

ہے قاعدہ کہ بھرتا ہے پانی جو ناگہاں​

دریا میں بیٹھ جاتی ہے ہر کشتیِ رواں​

پر اس جہازِ تیغ کو خطرہ نہ تھا وہاں​

عباس ناخدا تھے، علم شہ کا بادباں!​

دریائے خوں تھا تیغِ سبک رو کی ناؤ پر​

پر یوں رواں تھی جیسے کہ کشی بہاؤ پر​

​

پوچھا فلک نے، امن و اماں زیرِ ناؤ ہے؟​

آواز دی زمیں نے کہ ‘تیرا ڈباؤ ہے’​

اس نے کہا کہ تحتِ ثریٰ میں بچاؤ ہے؟​

بولی: نمودِ سینۂ ماہی و گاؤ ہے​

اس پوچھنے میں تیغ کا دریا جو بڑھ گیا​

نو پُل فلک کے کیا ہیں کئی پُل پہ چڑھ گیا​

​

کاٹا پلک میں آنکھ کو، پتلی میں نور کو​

پاؤں میں کج روی کو سروں میں غرور کو​

سینے میں بغض و کینہ کو دل میں فتور کو​

نیت میں معصیت کو طبیعت میں زور کو​

ذات اک طرف مٹا دیا بالکل صفات کو​

کیسی زباں، زبان میں کاٹ آئی بات کو​

​

جب سرکشوں پہ سایۂ تیغِ اجل پڑا​

بالوں کی طرح ہوش سروں سے نکل پڑا​

جھگڑا سر و قدم میں عجب بے محل پڑا​

دونوں کی بے خودی پہ بدن خود اچھل پڑا​

سر بھاگنے کو پائے سپاہِ عمر بنے​

بچنے کی آرزو میں قدم اٹھ کے سر بنے​

​

مردہ تھا سر میں ہوش، سراسیمہ سرفروش​

سر قبر، خود گنبدِ قبرِ حواس و ہوش​

بے جاں سلاحِ جنگ، پریشاں سلاح پوش​

دم مارا تیغ نے نہ ہلایا سپر نے گوش​

چلّایا کی کمان نہ تیر اک رواں ہوا​

ڈھالوں کے پھول چلنے کا چالیسواں ہوا​

​

روکی جو ڈھال اور بھی اندھیر چھا گیا​

روزِ سیاہ شامیوں کے منہ پہ آ گیا​

آخر بغیر بھاگے نہ ہرگز رہا گیا​

اور نہرِ علقمہ میں یہ بحرِ سخا گیا​

دریائے آبرو سے جو دریا کو بھر دیا​

دُرِّ نجف نے بحر کو بحرین کر دیا​

​

چلّو بھرا فرات سے سرکا کے آستیں​

عبرت سے دیر تک اُسے دیکھا کیے وہیں​

پھر لائے امتحاں کے لیے ہونٹوں کے قریں​

سینے میں دل تڑپ کے پکارا، نہیں نہیں​

گو مہرِ فاطمہ ہے پہ مجھ پر حرام ہے​

وارث جو فاطمہ کا ہے وہ تشنہ کام ہے​

​

پانی جو بے حسین کے منہ سے لگائے گا​

ہے ہے وفا کا نام ابھی ڈوب جائے گا​

اس وقت آبرو جو گئی پھر نہ پائے گا​

یہ روز اب زمانے میں کاہے کو آئے گا​

چلیے تو آبِ نہر سے کوثر بھی پاس ہے​

جب ہاتھ کٹ گئے تو نہ فاقہ نہ پیاس ہے​

​

غازی نے دل کے مشورے پر مرحبا کہا​

دریا سے رو کے پیاسوں کا سب ماجرا کہا​

کاندھے پہ مشک بھر کے دھری، ‘یا خدا’ کہا​

چلتے ہوئے اجل نے پیامِ قضا کہا!​

ہے ہے نصیب پیاسوں کا رستے میں پھر گیا​

سقہ حرم کا فوج کے طوفاں میں گھر گیا​

​

اکبر یہاں کھڑے تھے سنبھالے حسین کو​

سمجھا رہے تھے دیکھنے والے حسین کو​

اِن کی فغاں تھی ‘بھائی بلا لے! حسین کو’​

عباس آ گلے سے لگا لے حسین کو​

تنہائی اپنے بھائی کی بھائی پسند کی​

کوثر پہ آپ پہنچے ترائی پسند کی​

​

بانو پکاری: ضامنِ عباس کو بلاؤ​

لوگو کہو سکینہ سے لاؤ چچا کو لاؤ​

انگلی پکڑ کر فضّہ کی سوئے فرات جاؤ​

حضرت تڑپ رہے ہیں علم دار سے ملاؤ​

بھیجا تھا کیوں جو اُن کو نہیں اب بلاتی ہو​

عاشق ہو کیسی باپ کو اپنے رلاتی ہو​

​

سہمی ہوئی سکینہ قریب آئی ننگے پا​

ننھے سے ہاتھ جوڑ کے حضرت سے یہ کہا​

میں جاؤں بابا جان؟ نہ آئیں اگر چچا​

ضامن دیا ہے لو مجھے جھوٹا کریں گے کیا​

ایسے تو وہ نہیں ہیں کہ وعدہ بھلائیں گے​

فرما گئے ہیں نہر سے آگے نہ جائیں گے​

​

شہ رو کے بولے: ٹوٹ پڑا ہم پہ آسماں​

سچے ہیں بھائی، ٹھیک تمہارا بھی ہے بیاں​

اچھا نہ آگے جائے گا حیدر کا وہ نشاں​

کیا نہر پر اجل نہیں آ سکتی میری جاں​

دریا پہ کون روکنے والا قضا کا ہے​

دو لاکھ سے مقابلہ تیرے چچا کا ہے​

​

یہ سن کے ہو گئی وہ سراسیمہ اور کہا​

ہے ہے یہ اب کھلا مجھے بہلا گئے چچا​

لائے کہیں صحیح و سلامت انہیں خدا​

یوں روٹھوں میں کہ ان کو بھی معلوم ہو بھلا​

مجھ کو بھی ضد ہے پیاس سے جاں اپنی دوں گی میں​

پانی بھی ان کا لایا ہوا اب نہ لوں گی میں​

​

یہ ذکر تھا کہ نہر سے ماتم کا غل اٹھا​

نوحہ یہ تھا کہ ‘وا ولَدِی وا مصیبتا’​

اکبر لپٹ کے رونے لگے شہ سے اور کہا​

دادا کی روح روتی ہے، مارے گئے چچا​

ان کی عزا کا آپ بھی سامان کیجیے​

شہ بولے چاک میرا گریبان کیجیے​

​

ناگہ ندا یہ آئی: میں قربان یا حسین​

آقا حسین، قبلۂ ارض و سما حسین​

اے میرے وقتِ نزع کے حاجت روا حسین​

اے جاں بلب غلاموں کے مشکل کشا حسین​

ہچکی لگی ہے دم کو قرار ایک دم نہیں!​

بالیں پہ میری آہ تمہارا قدم نہیں!​

​

شہ نے کمر پکڑ کے کہا: ہائے بھائی جاں​

جانا نہ بے ملے ہوئے ہم آئے بھائی جاں​

اللہ تم تلک ہمیں پہنچائے، بھائی جاں​

دھڑکا یہ ہے نہ غش کہیں آ جائے بھائی جاں​

گو نورِ چشم تھامے ہوئے ہاتھ میرا ہے​

اس پر بھی دونوں آنکھوں کے آگے اندھیرا ہے​

​

اکبر کو ساتھ لے کے چلے شاہِ کربلا​

یاں قبۂ خیام گرے ہِل کے جا بجا​

دوڑی سکینہ ڈیوڑھی سے، اور رو کے دی صدا​

ہے ہے ستم ہوا، ارے لوگو غضب ہوا​

بابا سوئے فرات ابھی ننگے سر گئے​

لو صاحبو، ہمارے چچا جان مر گئے​

​

واں شہ کو نہر پر گہرِ مدعا ملا​

پر لال خون میں وہ دُرِ بے بہا ملا​

مچھلی کی طرح شیر تڑپتا ہوا ملا​

آنکھیں عطش سے بند ملیں، منہ کھلا ملا​

دیکھا کہ روحِ پاک سوئے حق رجوع ہے​

رکتی ہے سانس موت کی ہچکی شروع ہے​

​

یہ دیکھتے ہی آگے بڑھے اکبرِ جواں​

بڑھنا تھا بس کہ ہو گئے کپڑے لہولہاں​

دیکھا کہ دھار خون کی سینے سے ہے رواں​

حضرت نے پوچھا: کیا ہے؟ کہا: کیا کروں بیاں​

نوکِ سناں چچا کے جگر میں در آئی ہے​

کیا بے جگہ کسی نے یہ برچھی لگائی ہے​

​

لاشے پہ تھر تھرا کے گرے شاہِ نام دار​

جھک کر کہا یہ کان میں ہو ہو کے برقرار​

ہم دم، رفیق، دوست، وفادار، جاں نثار!​

بازو، جگر، ضیائے بصر، رونقِ کنار​

ہر زخم پر حسین فدا ہو، نثار ہو​

آنکھوں کو کھولو، بات کرو ہوشیار ہو​

​

سننا تھا یہ کہ ہونٹ علم دار نے ہلائے​

شہ نے جو کان لب پہ دھرے تو سنا، یہ ہائے​

چپکے سے کہہ رہے ہیں ‘میں صدقے حضور آئے’​

بچپن سے ناز آپ نے کیا کیا مرے اٹھائے​

اپنا غلام کہہ کے پکارو تو بولیں ہم​

آئی نہ ہو سکینہ تو آنکھوں کو کھولیں ہم​

​

یہ کہہ کے بے کسوں کے مددگار مر گئے​

حمزہ سدھارے جعفرِ طیار مر گئے​

جبریل بولے حیدرِ کرار مر گئے​

اب مصطفیٰ کے سارے علم دار مر گئے​

مولا جدا نہ بھائی کے لاشے سے ہوتے تھے​

شانوں کا خون چہرے پہ مل مل کے روتے تھے​

​

مَل کر لہو جبیں پہ امامِ امم چلے​

لاشے سے مڑ کے بولے کہ لو بھائی ہم چلے​

اکبر اٹھا کے کاندھے پہ مشک و علم چلے​

دو حشر سوئے خیمۂ اہلِ حرم چلے​

سقے کو ڈھونڈتے ہوئے گھر میں پھرے حسین​

پھر ہائے بھائی کہہ کے زمیں پر گرے حسین​

​

بانو نے رو کے پوچھا علم دار کیا ہوئے​

بولے تمہاری بیٹی پہ پیاسے فدا ہوئے​

شبیر کے حقوق سب ان سے ادا ہوئے​

ہم مبتلائے صدمۂ شرم و حیا ہوئے​

اس بے کسی میں سوگ کا سامان کیا کریں​

عباس کے یتیموں پہ احسان کیا کریں​

​

اس نے کہا کہ سچ ہے نہ مقدور و نے وطن​

موجود ہے سکینہ و اکبر کا پیرہن​

عباس کے یتیموں کو بخشیں شہِ امم​

پہنیں پدر کا خلعتِ ماتم وہ گل بدن​

چادر کو پھاڑ کر کفنی اب بناتی ہوں​

رنڈ سالہ اُن کی بیوہ کی خاطر میں لاتی ہوں​

​

زیرِ علم بچھائی نبی زادیوں نے صف​

بیوہ بھی آئی کہتی ہوئی ‘یا شہِ نجف’​

سر ننگے بیٹی اِس طرف اور بیٹا اُس طرف​

ملبوس لائی بچوں کا بانوئے باشرف​

یہ پیرہن تو سقے کی اولاد کے لیے​

اور سادہ کپڑے بیوۂ ناشاد کے لیے​

​

آئی نظر جو اکبرِ مظلوم کی قبا​

تھرائی تڑپی بیوۂ عباسِ باوفا​

اور دونوں ہاتھ جوڑ کے بانو سے یہ کہا:​

ٹھہرو خدا کے واسطے، ہے ہے یہ کیا کیا​

اکبر کے کپڑے خلعتِ ماتم میں دیتی ہو​

زینب کھڑی ہیں ان سے نہیں پوچھ لیتی ہو​

​

کیوں لائیں فرشِ سوگ پہ بن بیاہے کا لباس؟​

زینب بھی بے حواس ہیں، لونڈی بھی بے حواس​

وسواس ہے خوزادے کی جانب سے بے قیاس​

میٹھا برس تو خیر، غضب ہے یہ بھوک پیاس​

سب کنبہ اب تو جیتا ہے اکبر کی آس پر​

صدقہ اتاروں بچوں کو میں اس لباس پر​

خوزادے = شہزادے​

​

اکبر پہ جو کہ آنی ہو میرے پسر پہ آئے​

اللہ شاہزادے کا سہرا تمہیں دکھائے​

کُرتی سکینہ جان کی اور میری بیٹی، ہائے​

بس اب سدھاریے کہ مرا سایہ پڑ نہ جائے​

پُرسے سے سرفراز نہ نہ فرمائیے مجھے​

یہ سادے کپڑے آپ نہ پہنائیے مجھے​

​

رو کر کہا یہ بانو نے اس نیک ذات سے​

بس بس کلیجہ پھٹتا ہے ہر ایک بات سے​

رنڈ سالہ پہنو فاطمہ کبریٰ کے ہات سے​

یہ نامراد بیوہ ہے شادی کی رات سے​

بیٹی حسین کی ہے بہو یہ حسن کی ہے​

گھونگھٹ میں فکر دولھا کی خاطر کفن کی ہے​

​

رو رو کے بین فاطمہ کبریٰ نے یہ کیے​

ہے ہے دولہن بنی تھی میں ان کاموں کے لیے​

بس اے دبیر خوب صلے نظم کے لیے​

تائیدِ غیب کے ہیں نمونے یہ مرثیے​

بحرِ رواں ہے یا کہ طبیعت ملی ہے یہ​

سقائے اہلِ بیت ؑ کی دریا دلی ہے یہ