نواسی رسولؐ سیدہ زینبؑ کے مزار کے تحفظ کیلئے پورے ملک میں یوم عظمت شعائر اللہ منایا گیا، شام میں یہود کی سپانسرڈ شورش گہری سازش ہے، علماء کا خطاب

ولایت نیوز شیئر کریں

تحریک نفاذ فقہ جعفریہ کی کا ل پرمقامات مقدسہ کو درپیش خطرات کیخلاف پورے ملک میں یوم عظمت شعائر اللہ منایا گیا
عالمی ادارے، آثارقدیم مقامات مقدسہ کے تحفظ کیلئے جامع عالمی چارٹر منظور کریں، علامہ آغاسیدحسین مقدسی
شیاطینِ ثلاثہ نے مسلمانوں کا بالخصوص جینا دوبھر کر رکھا ہے، مسلمان عالمی شیطانوں سے چھٹکارا حاصل نہ کیاتوانہیں مزید امتحانوں کیلئے تیا ر رہنا ہو گا
شام میں صیہونیت کی گہری چال اور سازش آشکار ہونے کے بعد سہولت کار منہ چھپاتے پھر رہے ہیں،مسلم حکمران استعمار کے دامِ فریب سے باہر نکل آئیں
استعماری پیادوں کی دہشت گردی میں مظلوم عوام اور مقامات مقدسہ نشانہ بن جاتے ہیں۔سربراہ ٹی این ایف جے کاجامع مسجد اہلبیت ؑ میں اجتماع سے خطاب
مقامات مقدسہ شام، حجازِ مقدس اورکربلا ونجف و سامرا وخراسان عالمِ بشریت کے لیے مینارہ نور ہیں، علامہ بشارت حسین امامی
شام میں یہود کی سپانسرڈ شورش گہری سازش ہے جس کا فائدہ صرف دشمنانِ اسلام اُٹھا رہے ہیں، مرکزی سیکرٹری جنرل کاجمعہ اجتماع سے خطاب
حکومت پاکستان مقامات مقدسہ کی حفاظت کے مسئلے کو سفارتی سطح پر اٹھائے ،شام سے زایرین کی واپسی کااقدام قابلِ تحسین ہے۔ جمعہ کے اجتماعات کی قرارداد
پنجاب حکومت کی جانب سے عزاداری کے خلاف غیر آئینی ایس او پیز کا خاتمہ کیا جائے،جمعہ اجتماعات سے آئمہ کرام کاخطاب
تحفظ عزاداری کنونشن میں دفاع عزاداری کے عزم کو پورا کیا جائے گا اور ہیڈکوارٹر مکتب تشیع کے ہر حکم پر لبیک کہا جائے گا، جمعہ اجتماعات میں منظور کردہ قراردادیں

اسلام آباد ( ولایت نیوز ) ہیڈکوارٹر مکتب تشیع تحریک نفاذ فقہ جعفریہ پاکستان کی کال پر جمعہ کو شام سمیت مختلف ممالک میں زیارات و مقامات مقدسہ کو درپیش خطرات وبے حرمتی کے خلاف پورے ملک میں ”یوم عظمت شعائر اللہ“مذہبی عقیدت اور ملی و ایمانی جذبے کیساتھ منایا گیا، جامع مساجد امام بارگاہوں میں نماز جمعہ کے اجتماعات سے علمائے کرام، آیمہ مساجد نے خطبات دیتے ہوئے عالمی اداروں پر زور دیا کہ مقامات مقدسہ کے تحفظ کے لیے جامع عالمی چارٹر منظور کرایا جائے جس کی خلاف ورزی قابلِ تعزیر جرم قرار دیا جائے، آئمہ جمعہ والجماعت نے شام کی حالیہ شورش کے بعد مزارات مقدسہ نواسی رسول اللہ حضرت زینب بنت علی علیہ السلام سمیت سیریا کے دیگر زیارات کو دوبارہ کھولنے اور مامون و محفوظ بنانے کا مطالبہ کیا۔

جامع مسجد اہلِ بیت واہ کینٹ میں سربراہ تحریک نفاذ فقہ جعفریہ علامہ آغا سیدحسین مقدسی نے یوم عظمت شعائر اللہ کی مناسبت سے خطبہ جمعہ دیتے ہوئے نے کہا کہ شیاطین ثلاثہ امریکا اسرائیل و بھارت نے مسلمانوں کا بالخصوص اور انسانیت کا بالعموم جینا دوبھر کر رکھا ہے۔ انہوں نے کہا شام میں صیہونیت کی گہری چال اور سازش آشکار ہونے کے بعد سہولت کار منہ چھپاتے پھر رہے ہیں۔

علامہ مقدسی نے کہا کہ استعماری پیادوں کی دہشت گردی میں مظلوم عوام اور مقامات مقدسہ نشانہ بن جاتے ہیں۔ انہوں نے عالم اسلام او آئی سی اور مسلم حکمرانوں سے اپیل کی کہ وہ استعمار کے دامِ فریب سے باہر نکل آئیں۔ جامع مسجد قصرِ خدیجۃ الکبریٰ ؑترلائی کلاں اسلام آباد میں نمازِ جمعہ کا خطبہ دیتے ہوئے علامہ بشارت حسین امامی نے کہا کہ مقامات مقدسہ شام کے ہوں یا حجازِ مقدس اور کربلا ونجف و سامرا وخراسان عالمِ بشریت کے لیے مینارہ نور ہیں جن کی عزت و حرمت سب پر لازم ہے۔ انہوں نے کہا کہ شام میں یہود کی سپانسرڈ شورش گہری سازش ہے جس کا فائدہ صرف دشمنانِ اسلام اُٹھا رہے ہیں۔

امام بارگاہ سادات ڈھڈیال، چکوال میں نماز جمعہ کے اجتماع سے خطاب کرتے ہوئے صوبائی ناظم الامور تحریک نفاذ فقہ جعفریہ علامہ مقصود رضا عابد نے کہا کہ ہم مزار سیدہ زینبؑ سمیت شعائر اللہ کے تحفظ کیلئے عالمی اداروں کے مردہ ضمیر کو جھنجھوڑ تے رہیں گے۔

جامع امامیہ مسجد سموال شریف سمیت میر پور آزاد کشمیر میں مزار سیدہ زینب بنت علی سلام اللہ علیہا کیلئے جمعہ کے خطبات میں صدائے احتجاج بلند کی گئی۔

یومِ عظمت شعائر اللہ کی مناسبت سے مسجد وامام بارگاہ قصرِ ابوطالب، مسجد وامام بارگاہ گریسی لاین چکلالہ،قصرِ شبیر،دربار شاہ چن چراغ سمیت شہر کی دیگر مساجد میں بھی اجتماعات سے علماء و مقررین نے خطاب کیا۔ اجتماعات میں منظور کردہ قرارادوں میں حکومت سے مطالبہ کیا گیا کہ مقامات مقدسہ کی حفاظت کے مسلے کو سفارتی سطح پر اٹھایا جائے۔ ایک قرار داد میں شام سے زایرین کی وطن واپسی کے لیے حکومت کے بروقت اقدام کو سراہا گیا اور تاحال محصور زائرین کی واپسی کا بھی مطالبہ کیا گیا۔ ایک قرارداد میں یہ مطالبہ کیا گیا کہ پنجاب حکومت کی جانب سے عزاداری کے خلاف غیر آئینی ایس او پیز کا خاتمہ کیا جائے۔ قراداد میں واضح کیا گیا کہ تحفظ عزاداری کنونشن میں دفاع عزاداری کے عزم کو پورا کیا جائے گا اور ہیڈکوارٹر مکتب تشیع کے ہر حکم پر لبیک کہا جائے گا۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

This site uses Akismet to reduce spam. Learn how your comment data is processed.